最近樓價越升越癲，連居屋劏房都紛紛炒起，唔少人趕搭尾班車成為樓奴一族，但死供爛供換來一層發水樓更要瞓窗台，打風落雨有得震無得瞓。其實想瞓得舒服，以下的上車盤VWGolfVariant，面積大實用率高、質素有保證。
記者：李鑒泉
攝影：蔡家輝
模特兒：Alia@PureModels
翻平後座容量大升
新車大多是明碼實價、一分錢一分貨，唔似發水樓般將會所、停車場甚至垃圾房納入（建築）面積中。向來走抵食夾大件路線的VW，最近引入GolfVariant旅行車，儘管底盤相同，不過4,534×1,781×1,504mm的車身尺寸卻比揭背版大一個碼，單是長度已增加335mm，在軸距不變下，多出空間自然落在巨大尾箱上，據知這個尾箱原本已有505公升儲物空間。實際測試，放入26吋旅行篋後，仍有充足位置容納紙皮箱及攝影師的隨身行李。如果將後座扳平，容量更急升近三倍至1,495公升，真係隨時可以瞓多幾個模特兒。另外，車主又可在車頂路軌加裝單車架，方便四人齊齊外出踩單車。
不過，在實用性倍增的背後，這台拉長版Golf，線條感覺如擁有長車頭及長尾的三箱式房車。然而，車頭造型不變，隆起車頭蓋及鬼面罩依然吸睛，廠方更換上17吋合金輪圈，睇得又打得。受惠車身升高，雖然前後座長度不變，頭部空間感卻得以提升，另一吸引點就是兩截式巨型天幕，前半部份更可打開，比起對手只能微微升起，自然更勝一籌。設備方面則有真皮座椅、6.5吋輕觸式屏幕、支援USB播放的6CD音響、泊車提示及轉向霧燈等，勝在夠實用。
操控同樣易上手
Golf有幾容易操控相信毋須再多講，同樣易上手的GolfVariant，車重1,426公斤，大家關注的是尾箱帶來額外約百公斤「脂肪」，對表現有沒有大影響。GolfVariant用上與揭背版同款的1.2公升TSI引擎，輸出122匹馬力，即使配上七速DSG雙離合器波箱，靜止起步時難免有滯後感。但只要轉用Smode，引擎因高轉變得生龍活虎，反應判若兩車。廠方數據指，0-100km/h加速9.9秒，極速201km/h。此外，入彎時明顯感到尾箱存在，加上是頭轆車關係，就算明知有ABS、EBD、ESP等穩定系統，在彎道仍未敢放心去盡。當然，有多少車主會買旅行車來跑山劈彎？如果閣下追求的是一部既實用又能滿足快跑要求的旅行車，GolfVariant絕對勝任有餘。本周末，新車將於奧海城VW車展展出，上車要趁手！
VWGolfVariant
引擎：1,390cc直四TSI
馬力：122PS/5,000rpm
扭力：200Nm/1,500-4,000rpm
傳動：七前速DSG，前輪驅動
售價：未定價
查詢：36989688（VWHK）
VW車展
地點：奧海城2期地下主題中庭
日期：8月25-26日
時間：11am-8pm