睇完最後一集《變形金剛：黑月降臨》，擺明結局留番條尾。雖然導演MichaelBay扭計話唔拍……住，不過打機界懶理，繼續出新Game搵銀。今集舞台仲由地球打返上老鄉，更有巨形猛獸混天豹以及銀河暴龍Grimlock加入戰團，唔再一味飛機同跑車，有新鮮感喎！
記者：陳國輝
近戰攻擊暴龍超蝕
戰爭背景唔再係地球，轉為以變形金剛黑暗時期嘅內訌為主軸，無晒班人類，由博派、狂派兩Team機械人互毆已經有噱頭！主角當然由柯柏文、麥加登為首，但今集重點已經唔係佢哋，而係新加盟、體積超巨大嘅變形金剛。最難搞肯定係大你幾十碼嘅混天豹（Bruticus），佢屬於Shockwave的實驗產物，由Onslaught、Swindle、Brawl、BlastOff以及Vortex五架戰車所組成，組合之後移動速度雖然好緩慢，但防守力與攻擊力強橫，尤其留意佢右手可不停噴出火燄，也可掟出遠程手榴彈，遠近距離都難以應付，唔練習吓好難打！
至於可單拖隻揪嘅銀河暴龍Grimlock，佢處於機械人狀態時，手執長劍兼盾牌，最擅長打近身搏擊，埋身好容易畀佢KO；當化身為暴龍形態之後仲癲，佢唔只身體各部份都變成武器，例如甩尾、重踏以及用利牙施展攻擊，更可用口噴出火燄，幾乎無機會同佢近身搏鬥，超惡！
自製專屬Transformer
故事模式絕對係遊戲嘅例牌菜，但唔係每個玩家都鍾意照劇情嚟玩！好似多人作戰模式就支援四人協力玩法，大家好熟悉嘅變形金剛例如大黃蜂、星星叫以及麥加登固然走唔甩，另外，遊戲亦特別追加TransfromerDIY全新玩法，畀你發揮創意！你可以創建四種唔同類型戰士，包括潛入兵、破壞者、科學家以及巨人族，各自可根據擅長嘅武器或防衞特性，各司其職；據稱遊戲正式推出之後，大家仲有機會單撈Dinobots以及Insecticons兩大種族，擴充可玩性，當然呢啲全部都要收費。
《Transformers：FallofCybertron》
機種：XB360、PS3
類型：動作＋射擊
人數：多人
售價：約$620