雖然話經濟唔好，銀行依然四處挖角。星展香港企業銀行部門早排至少有六人俾其他銀行挖走咗，其中有兩、三個係跟住阿頭一齊過檔渣打。
加盟渣打「交流」
渣打、星展同花旗三間銀行嘅內部文化相近，過往都有好多「交流」紀錄，即係賓架們呢間走去嗰間，轉工頻繁。聽聞自從前渣打高層范思博（AlexThursby、行內俗稱四哥）加盟澳盛銀行（ANZ），做邵銘高（滙豐亞太區前行政總裁）左右手後，渣打同ANZ都多咗呢類「交流」。
另一邊廂，星展最近整咗個新嘅輸入資料系統，部份做企業銀行嘅同事用極都唔上手，用用吓又要轉番人手跟進，煩到死。遇着隔離間銀行挖角，反正度度都係咁做，咁就跳槽走咗。星展嗰邊冇承認亦冇否認係咪好多人走，只係話會繼續請人配合業務發展，答案夠晒標準。