遠展（035）橫行半年，幾條平均線叠埋一齊，等爆。報章資料話，遠展喺今年3月底數據，預售樓花達到48億銀，香港佔咗3億銀，其餘包括海外袋鼠國40億銀及星洲5億銀。遠展家陣市值幾多？24億銀咁大把。又呢期香江樓市火紅，遠展已經計劃推出西洋菜北街項目，相信個盤應該會去得唔錯，亦進一步支持總體賣樓成績。而集團物業發展大豐收，相信嚟緊日子嘅成績單，肥過肥仔水，靚爆鏡。又唔計磚頭重秤，遠展NAV3.8元，折讓63%。正當呢期已經有唔少同級磚頭股炒到飛起，遠展仲橫行唔郁之時，呢個折讓就顯得吸引。唔好大貪，買遠展，博升三成計，目標價1.83元，NAV折讓51%，仲有大把再向上收窄空間。
威華達趁低落鑊
威華達（622）話尋求出售揸住嘅港華燃氣（1083），餘下最多1.95億股，每股售價唔會低過4.2元。就以呢個價計計數，等值8.2億銀，已經超過集團總市值5.9億銀，威華達超平。又集團單喺上年底，另揸淨現金13億銀，係超級現金牛。呢轉趁鑊氣成形，兜轉博升20%，到貼近0.1元，未有耐上到NAV0.49元。
錢雋