55歲的子宮癌康復者黎美心，05年突然身體不適，醫院收診檢查，確診第三期子宮癌，即時入院接受手術，切除整個子宮及輸卵管，再進行電療化療，整件事非常突然。生活的突變，身體的變化，情緒上也稍有不穩，「患病後對自己好失望，但戲劇令我搵番嗰份自信！」
不快感覺找到出口
剛完成治療，失去子宮，黎美心以為自己無事，心態上可以接受，「以為無所謂，都有家庭，但原來會影響荷爾蒙，要食雌激素，雙性關係會影響」。她坦言，術後一段時間對自己好失望，對任何事都無自信。其後，見到癌協有戲劇治療課程，出於好奇參與，事後發現上堂好開心，每星期都好期待上堂。
「每堂都會扮演唔同嘅角色，以為自己做唔到，原來最後又會做到，自信慢慢返嚟！」她記得，有一堂治療師要求同學教煮餸，她正正是扮演大廚一角，「我一向口齒不清，應該唔可以好有條理講啲步驟，結果慢慢講我又成功咗」。上堂要創作故事，或多或少都會把自己的經歷反映，不快與失望的感覺終於有一個輸出口。
「生命原來有Take2，過咗呢個病，咩都有可能」。黎美心坦言，以前會覺得生活若過得沒有意思，其實可以不活下去，「家係最後一啖氣都要唞埋佢」。人生觀180度改變，亦希望以自己的經歷鼓勵其他病友。
《蘋果》記者