被網民譏笑為世界最佳「衞星」球隊嘅阿仙奴，上周六揭幕戰頭炮打唔響，主場悶和新特蘭0:0之餘，賽後更加落實，將防守中場桑治（AlexSong），賣埋畀巴塞隆拿，換番1,900萬歐元（約1.8億港元）轉會費。阿仙奴同領隊雲格嘅慳家組軍作風，已經不斷俾高登巴打改歌詞諷刺，今次更加將「歌曲」（Song）賣走，唔知巴打們又有咩搞作。
我求大俠都好佩服高登巴打嘅創意，尹佩斯轉投曼聯後，立即改編咗黎瑞恩嘅經典金曲《一人有一個夢想》，變成《一年賣一個隊長》，話口未完，桑治又喺上周六落實加盟巴塞隆拿，亦都係近12年嚟，第7位投奔魯營嘅阿仙奴球員，等睇巴打有冇咩新搞作。
擬借紐尼沙軒「填洞」
平心而論，巴塞以往出價都唔低，奧華馬斯、法比加斯等都過3,000萬歐元，或者阿仙奴球迷「阿Q」啲咁睇，比堤、希比更加打唔出兵工廠時期水準，直頭可以講係水貨。24歲嘅喀麥隆中場桑治，當初06年由法甲巴斯蒂亞加盟阿仙奴，雲格只係花約150萬歐元，今時今日升值十幾倍，站在經濟角度，簡直係「gooddeal」㖭！
不過，我求大俠只不過係升斗球迷，支持阿仙奴唔係理佢盤數有幾靚，而係睇佢比賽有幾勁；前晚睇佢哋英超揭幕戰主場對新特蘭，阿仙奴就認真唔勁，新兵普多斯基、辛迪卡索拉係就係落力，不過攻極都攻唔入，下半場貴為上屆法甲神射手嘅基奧特，接應辛迪卡索拉妙傳單刀，竟然射斜，就咁畀客軍悶和0:0，首場波已經失兩分。
當然，雲格睇見勢色唔對，都要擴軍安撫吓球迷；好似借用西甲皇馬嘅土耳其中場紐尼沙軒，似乎快將成事，另外又重提收購雷恩嘅法國中場馬維拿，作價約1,000萬歐元。
不過，睇完馬維拿喺歐國盃嘅表現，由佢頂替桑治個防中位，我求大俠就覺得真係唔多夠班。