九巴後人雷禮權前晚喺銅鑼灣富豪酒店搞中式懷舊派對慶祝佢53歲生日，雷禮權以白色唐裝衫配大量「朱義盛」示人，仲用筲箕扮大肚腩，搞笑話自己係五世祖，佢個女雷正殷以懷胎八個月嘅未婚媽媽造型示人。
一向同雷家友好嘅賭王，派出猷君出席，佢着鮮紅色西裝成個四哥咁，猷君件衫仲掛咗個牌子嘅牌，佢自己改咗個牌子做ARMANI，真搞鬼，猷君仲同扮八両金嘅雷兆光同雷兆光老婆林靜怡一齊玩。同猷亨傳過緋聞嘅林嘉寶就以一雙肥美粉紅色肉腿現身，佢拖住媽咪林李婉冰搶鏡，其間有位全豹紋look嘅賓客仆親，可能太興奮啦。
撰文：洪紅克
