成日話金融企業高層鍾意幫襯中環三大中菜會所：上海總會、蘇浙滬同鄉會同馬車會，聽證券行老闆講，家要加埋灣仔嘅浙江軒先得，呢間仲要係唔使入會就可以幫襯。
浙江軒由富豪御用經紀李和聲、佢位公子前金銀業貿易場理事長李德麟等25位浙江鄉賈夾錢買物業開嘅。李德麟話，佢哋一班同鄉想開一間浙江菜館好耐，講都講咗十幾年，只係一直搵唔到啱心水嘅地方同師傅，舊年喺上海總會同蘇浙挖角，又搵到灣仔呢個地方，咁先開到。
圓十幾年心願
好多人揀2011年11月11日結婚，浙江軒就揀呢日開業，攞個意頭咁話。李德麟最鍾意食浙江軒嘅鰣魚、海蜇頭同熏魚。華華早排同經紀喺呢度食晏，熏蛋、熏魚同醉豬手真係相當唔錯，有驚喜，尤其係醉豬手，食落爽口，唔覺肥膩。唯一要彈，可能係地點唔及中環就腳。