梁特首上台個半月，就搞到樓市升勢不止，太古城一日有十三宗成交，沙田第一城有一細單位上午出租、下午出售，康山居屋破八千元一呎……唔多唔少係梁特首嘅功勞，乜唔係呀，佢上任不久就話推出5000白表人士可免補地價買居屋，然後上星期出口術話政府唔會拉低樓價遷就購買力，算唔算係為中小單位價格加柴添火？
呢勻好多人跌晒眼鏡，包括左丁山在內。左丁山在梁振英當選後，預期佢會大力推行多建公屋，多建居屋等政綱，中小住宅單位在未來數年行將供應大增，非豪宅價格必然受壓、下跌；反之，豪宅大單位因政府不理，供應不足，有內地客炒作，必然繼續上升！
唉吔，錯晒咯，現時樓市走勢則與左丁山預期相反，豪宅成交比較淡靜，價錢在高位徘徊，不見瘋狂。癲咗嘅反而係一啲上車盤、中產盤，當初期望梁振英治理樓市，打擊所謂「地產霸權」，令市民容易啲買樓嘅人士，又係完全錯晒。
以前曾俊華司長久唔久就會出口術，與金管局總裁陳德霖一齊唱淡樓市，七月一日後，曾俊華隱形，面對家樓市真係開始癲癲地嘅情況，完全唔敢出聲噃！點解呀，唔通產業測量師梁先生對地產認識太深，唔輪到曾俊華加把口？但係連日有報道太古城、沙田第一城、淘大花園住宅單位炒到破九七價，梁特首卒之感到有壓力，特別向記者發言強調政府會採取措施，壓抑任何可能出現的投機活動，防止物業市場過度信貸云云。
呢番說話係舊嘢啫噃，以前曾俊華陳德霖已經講過晒，至今全不收效，講完炒家買家一樣蜂擁入市，那管甚麼SSD（特別印花稅）。點解會咁樣呢？幾位資深股市、樓市投資者認為，任李四叔點講買股好過買樓，群眾智慧就認定買樓好過買股，今天供樓利率空前低而通脹率高企，群眾有錢就傾向買樓對抗通脹，要等到利率上升，通脹下滑，負利率消失，正利率重臨之時，樓價才會穩定下來，但利率與通脹均非特區政府所能控制，政府只能用行政手段（如SSD）調控樓價，完全無說服力。