【本報訊】經歷一夜風雨，被扔下「孤島屋」的八旬盲婆婆謝珠英，徹夜未眠。「個風唔大，噚晚冇食飯，半夜肚餓瞓唔着，又俾蟻咬！」婆婆膝蓋痛，起床做飯很吃力。慶幸八號風球除得早，否則惡劣天氣送飯服務便會暫停，「自己煮囉，唔係周身痛我鍾意自己煮，佢哋啲飯好硬」。
報道刊登後，慰問如雪花飄來，「唔識我都問候我，社署今朝話嚟探我，我都多謝佢哋關心」。謝婆婆感慨陌生人尚且關心，但跟她隔屋同住廿載的二房孫兒，卻一個電話也沒有。「打畀佢都唔聽，仲話打畀我！」婆婆屋內仍放着曾孫的玩具，「我好掛住三個曾孫女，有時聽到門外有人喊，都以為係佢哋」。
着記者不要騷擾婆婆
曾聲稱不認識婆婆的八鄉上村永慶圍村代表黎偉雄，領着婆婆的大嫂和姪兒，還有六名食環署滅蟲鼠組人員到場，幫忙滅鼠除蟻外，還藉機「發爛渣」，「呢單嘢搞到我身為一個村長俾人怨，搞到好冇面！」
婆婆被大嫂拉出屋外，坐在椅上像被審判，黎偉雄暗地責怪婆婆︰「點會冇人理你！大嫂又喺度，啲姪又喺度，點會冇人理你？」黎又硬當婆婆「代言人」，「你係唔捨得呢度，唔捨得大嫂，先唔搬走，係咪？」婆婆解釋無奈留守的原因︰「我行開，呢度俾人霸咗嚟住，或者拆咗都唔知！（黎插嘴︰有大嫂喺度！）大嫂都唔知，你估佢好得閒。」
為了擺脫「罪人」角色，黎偉雄竟發惡叫記者不要再騷擾婆婆，更指她有最親的大嫂照顧，惟當記者詢問何以沒親人為婆婆爭取收地時，黎即推卸：「係嗰班土地正義聯盟喺度搞？」眾人在屋內上演一場20分鐘「大龍鳳」後，便匆匆離開，屋內再次回復孤寂。
