緣未盡，上季本欄捧狂牛炒意埋齋，奧運圓滿。今天8‧18英超開鑼大日子先不報憂談羅賓‧尹佩斯，考眼光搵到食更實際；開鑼日，夏天友賽從不可成重要指標，份賽績表充滿陷阱，你我也靠估居多，小注撐西南軍雷丁及東北軍紐卡素兩主場隊，靜靜起革命，讓球盤互串最合。
今季欄名「英倫心聲」，係希望嘗試多用另一種思維，從圈內人包括馬會嘅老外操盤手或者各隊波士、球員及一眾insiders部署及賽前見解，分享英超出擊心得；季前牙骹戰，小弟聽到滿街都是，好不熱鬧，小弟也聯同另一兵迷牽牛再次聯手，與紅軍躉仙道彬牙骹一番，一餐自助餐，鬥總分到尾，冇咗尹佩斯前dealdone，應承讓少少，蝕咗？定係當豪俾彬兄？
轉入正題，英超強隊開季搶人依然熾熱，經濟低迷，但實情係贊助費加電視轉播費收入依然豐厚，一升班穩執4、5千萬鎊以上，邊個唔流晒口水想入股分一杯羮；雷丁上季喺英冠雷霆萬鈞，主場取超過6成勝率(不敗率更逾8成)下，無敵升班，新俄國班主正式話晒事，睇吓佢哋今季購入球員，小弟更有憧憬。
喺英超，唔止係感覺，慣常升班第1季最勁，第２季起露底兼激情稍減，最危險。俄佬心聲唔似齋吹水，佢話睇準雷丁會係英國西南區獨大球會，球隊踢得好，可俘虜約8百萬人口，到時錢途無限；佢坐言起行，親自繞過領隊麥達莫，購入同鄉俄國轟炸機普格恩耶克打箭頭，啱晒呢類打快上快落，側擊凌厲嘅小球會。
麥帥亦唔輸蝕自己簽埋唔少當打英冠精品，平價來投，更合小弟心意，包括上季尾帶森林出鬼門關嘅射手麥奇利，同加里夫巴利出道時嘅師兄弟嘅基斯根達、牙買加中堅馬里亞柏等數將。雷丁主場特勁，少讓雖辣，更有硬淨箭頭羅拔斯停賽。還有一數據大家可以存記，翻查近3季3支升班馬，首場聯賽全不勝，當中遇到曼聯及曼城等強豪者，必變炮灰；但小弟認為呢隊波今季長線有追捧價值，希望今場可先破數據，碰巧對手係上季中後段差唔多散晒兼只屬地頭蟲嘅史篤城，平/半上盤，和波輸半格，風險倒可承受。
靜靜起革命，班波越執越靚還有小弟視為今季奪標冷門嘅紐卡素，平手盤對新帥登場兼無鋒嘅熱刺，中到雷丁串落這支尾場嘅東北軍，近3倍淨回報也不錯。其餘一注周日英超冷門早飛，博韋根和到車仔，射落聽去曼城做炮灰嘅修咸頓零入球波膽，分頭也不弱。
各有前因莫羡人，羅賓變心成定局，兵迷憤怒會漸淡，紅魔躉興奮會漸過；做人對事睇長遠少少，看風駛喺英超見盡凡幾，路遙知馬力，阿仙奴今季會否冧檔，非邊個任主力炮手，而係升做副領隊、決心執好條防線嘅名宿保特。
（下次見報：22/08）
蘋果波神
今周精選
正
紐卡素(平)
副
雷丁(上)
冷
韋根和(4.05)x
曼城2:0(6)，3:0(6)