今年暑假過得好快，歐洲足球聯賽結束後不久，就有歐洲國家盃，然後有倫敦奧林匹克運動會，倫奧完結，今日又到英超開鑼咯，鍾意睇電視直播體育賽事嘅，可能已經睇得好疲勞，各位宜對身體健康多加注意，不要發生昂坪360營運總監梁偉文先生睇完奧運直播之後早上往打籃球，心臟病事件重演。
倫奧閉幕禮，聽講好好睇，但我地成班人考慮到早上四時起床睇直播，影響睡眠，個個都唔制。但財務總管W就唔同，佢認為人一世物一世，人生可以睇到幾多個奧運吖，故此每逢奧運之年，佢必定盡量抽空睇直播；今次亦不例外，仲叫醒個乖仔一齊睇倫奧閉幕禮，親自講解一番，話好有收穫喎。問佢有乜收穫，佢話：「你都講過睇奧運講國民教育啦。倫敦奧組委LordCoe在七八十年代係中距離800至1500米賽跑名將，攞過四面奧運金牌，想唔到佢辦起事嚟，咁有組織力，將倫奧搞成一個嘉年華會、大派對，充滿歡樂氣氛。我對讀中五嘅仔講：08京奧係中國國力表現，12倫奧係英國人民創意演出，性質完全唔同。LordCoe在閉幕禮演辭，多謝所有興建體育場館人士、奧運義工，並非多謝黨國領袖支持，並非多謝女皇政府，此是人本政治，人性之表現，絕非黨性！」
咦，過往總管W到過英國學習，與英國商人交手多次，咪話過英國人多偽善，表裏不一嘅咩？總管W話：「就算係公關演辭，人地都講得好，在適當場合發揮得淋漓盡致，以管理技術睇，你都要欣賞呀！」
這個當然，英國人知道講錢唔夠中國多，辦倫奧並不大手筆，倫敦主場館在開幕禮過後，可以拆掉一半供球會使用，韋斯咸與熱刺就爭到要打官司。每次奧運都有動人故事，今年嘅偉大體育成就有飛魚菲比斯打破五十幾年紀錄，三屆奧運奪十八金，前無古人，另外賽跑飛人保特連續兩屆奪得男子一百、二百、四乘一百接力金牌，亦屬空前，夠晒偉大，但保特是否歷史傳奇最偉大，仍有爭論，起碼CarlLewis連續四屆奧運在跳遠、一百米，及接力賽贏得九個金牌（1984-1996），保特是否叻過劉易斯，有排拗！