商台DJ朱薰喺2010年10月10日同Mr.成員Dash嘅孖生兄弟譚健榮結婚，最近造人成功，日前朱薰演舞台劇《愛可以多狗》時，公佈有咗4個月，朱薰喺星期日先至忙完部舞台劇，以為佢會好好喺屋企休息安胎，點知前日佢又拖住老公出街，呢個大肚婆真係好動。
全副武裝
着住件鬆身裙同水靴嘅朱薰，前日傍晚6點左右同老公阿榮手拖手去中環ifc行街，佢兩公婆去咗一間書店睇書，全部都係同BB有關，好明顯係為自己生BB做好準備，一於睇多啲、知多啲照顧BB嘅知識。期間朱薰想攞書架高處一本書嚟睇，阿榮見到即刻幫老婆大人，唔使朱薰擒高擒低，真係體貼。朱薰同阿榮喺書店逗留咗半粒鐘之後買咗幾本BB書，由阿榮攞住，然後兩公婆手拖手離開繼續行街。
採訪、攝影：陳辰、朱志聰