《中環》
章小蕙舊愛陳曜旻（白頭陳）個女陳小韻，年前嫁畀商人KinChan後，舊年生咗個B仔Liam，唔經唔覺囝囝已經一歲。前日下晝3點幾，陳小韻抱住B仔帶埋女傭去中環萬年大廈，嗰幢大廈有好多診所，仲有好多媽咪帶埋BB出入，估計陳小韻係帶BB去睇兒科醫生。不過Liam睇嚟好健康精靈，唔多似唔舒服，可能BB只係做身體檢查。
一歲嘅Liam體重其實有番咁上下，但陳小韻沿途只係單手抱住囝囝上落樓梯，原來佢係用咗BB抱帶輔助，相反同主人一樣束馬尾嘅女傭，只係好輕鬆孭住個袋。
扁嘴引女傭笑
陳小韻喺萬年大廈逗留咗兩粒鐘後，喺下晝5點抱住BB偕女傭離開，小韻其間仲望住女傭扁扁嘴，搞到女傭忍唔住笑，之後佢哋一齊上咗部七人車離開。
採訪、攝影：朱志聰
