「升、升、升……」無綫經典電視劇《大時代》入面，方展博喺交易大堂不停嗌升呢個情節，相信電視劇迷同股民都唔會忘記，呢一幕更被稱為大奇蹟日。
五年前嘅今日，恒指亦曾出現如此戲劇性走勢。港股當時受美國次按問題困擾，由高位23500點水平一直向下插，2007年8月17日，恒指即市再狂瀉近1300點，失守20000關之餘，連牛熊線都穿埋。正當大家諗住牛市已死之際，大市喺最後一句鐘，竟然反高潮急彈，大戶買盤源源不絕，指數最後由最低位回升千點，埋單只係跌285點。
如此過山車式走勢，真係心血少啲都會頂唔住暈低，稱之為大奇蹟日，肯定冇人會反對，港股其後更因為直通車消息刺激，直闖歷史新高㖭。家個市悶氣沉沉，華華都好希望大奇蹟日今日再出現就好喇。