【本報訊】菜園村收地事件中被扔（粵音：型）下了，而且被遺忘的八十歲失明婆婆謝珠英，被困孤島屋近一年，終被「注意」了，社署、傳媒、菜園村關注組及婆婆的親戚紛紛蜂擁而至，上門了解情況。有網民更要買下婆婆的石屋，以便她安心入住老人院。謝婆婆卻一心只希望政府重新考慮收地，用賠償金購買新屋：「希望政府收番我間屋，等我安心離開呢度！」
港鐵人員鋪平路面
記者昨日往上村探望婆婆，發現行人路一日內已起了變化。有港鐵工程人員以石屎將路面凸出的水管鋪平，又放置鐵架度位準備擴闊路面，婆婆家門外則貼有多張通告，提示工人勿再把單車放於通道，方便婆婆以輪椅出入。
婆婆被困孤屋的報道刊登後，引起社會關注，但婆婆昨天早上起床後，一如以往地坐在椅子上發呆。11時，有姑娘上門送飯，此時電話響起。她拿起聽筒，「啊啊」的回應，原來是香港平安鐘協會來電慰問。「成年都冇打畀我！今日又打嚟問我身體點呀，叫我試下㩒平安鐘，話得閒可以打畀佢哋傾吓偈」。
兩網民有意買石屋
謝婆婆說，高鐵工程開展後，社署從未上門探望。昨午近兩時半，社署三名職員首次上門了解情況，在家中閉門談了接近兩小時，除了向婆婆解釋收地情況，並安排婆婆入住安老院，卻遭婆婆婉拒。
「咁間屋點呀？點解唔肯收咗我間屋了咗我嘅心事……」婆婆擔心搬走後，這個她和丈夫用盡積蓄買下的「家」便會荒廢，「我只係想政府好似當年收菜園村咁，收咗我間屋，我有筆賠償就可以喺附近買間屋住」。她不甘心就這樣搬往盲人安老院。
下午4時，門外突然出現三女一男的訪客，其中三十多歲的姓謝男子，說自己是婆婆的姪子，「我哋已經移居英國，今次專程返嚟香港探親」。說罷便進入屋內，不肯接受訪問。
土地正義聯盟成員朱凱迪亦趕來，他說收到兩名網民電郵，表示想買下婆婆的屋，故專程來跟婆婆商談細節，「其實兩個網民都冇乜錢，但佢哋好有心，睇吓可以點樣幫到阿婆」。
下午6時，眾人離開謝婆婆的家，她嘆了一口長氣︰「好耐冇講咁多嘢，好攰……希望佢哋真係幫到我。」雖然婆婆搬屋心切，但政府仍未有考慮酌情處理，運輸及房屋局昨日回覆時表示，暫不考慮收回土地，但會為婆婆提供臨時行人路出入。
蘋民洗版
朱小師
老人家對舊居有感情，是人之常情，只是居住環境實在不宜再留，逝者如斯，社工請勸婆婆到安老院為好，我見滄海變桑田，人卻有情心不變，思之不無傷感者。
TimTong
好有強國政府做事風範，逼到你自己走，一毫子都唔使賠返畀你！
KamChiHui
狼震英的政府去了哪？佢哋不是說過要改善民生？急市民所急？可能啲高官放假旅行去了，唉！老婆婆一把年紀同失明，就算佢想點同合不合理也應該照顧佢啦。
DavyChau
菜園村的人收了錢，一走了之，貪婪的人有報應！又話誓死保家園，請看留下的人點收科？又不是貪錢！唉！賤種！不是希望政府而是希望菜園村的人站出來吧！
JulianPoon
反高鐵嗰陣咁鬼團結，到上咗樓收晒錢就雞飛狗走……！！人性！！希望社工做到嘢，幫到婆婆啦。
VivianLi
無良政府，打壓婆婆！有乜可能唔賠錢畀佢㗎，唔好見人老眼又盲就蝦人囉！社工唔單止要為佢安排去老人院就可以了事，仲要為佢爭取番應有嘅賠償囉！
PhoebeChung
希望政府真的能夠體察到謝婆婆的境況，只送兩餐並不能解決她心理威脅及風風雨雨的凄凉，人間地獄的日子不易過啊，她畢竟80歲了，還能走多少人生路？
HokMuiMeimeiWan·HongKong
婆婆對眼盲，香港政府仲盲。
