今年成日有啲新股上市無耐就發盈警同更改集資用途。公關公司皓天（1260）上市4個半月，股價潛緊水五成，噚日就話因為仲未搵到收購合併目標，將原先打算用嚟收購嘅錢，拎1億買一年期基金收息先。收購變收息，真係咁都得！？
市場動盪改變策略
皓天今年3月尾上市集資3.1億，當時話有八成資金用嚟收購中港同業，要發大盤生意嚟搞，仲預計可能今年中鎖定目標咁話。但立秋過埋都無聲氣，家陣仲改埋集資用途，拎1億買信達（香港）資產管理發行嘅一年期擔保票據，扣咗手續費，一年回報有5.85厘。
皓天方面解釋，上市集資回來原本打算用嚟收購嘅2.5億仲未用，主要因為呢排市場動盪，所以收購策略變得審慎，反正啲錢齋擺唔郁，咪拎嚟買嘢收息先，等一年後再搵收購目標。