現年39歲嘅歌手李樂詩（Joyce）前日喺醫院生咗第二胎，由於係順產，搞到Joyce足足經歷12個鐘陣痛嘅過程，細仔先至順利生咗出嚟，BB有成七磅半咁重，相當健康。Joyce噚日向好友報喜，大家都戥佢開心，祝佢哋一家四口幸福快樂。
高齡產婦索氣
Joyce同舊愛杜德智分咗手之後，就戀上金融才俊TedLee，佢哋喺08年拉埋天窗，結婚第二年就生咗大仔Maxton。今年Joyce宣佈再度懷孕，不過第二胎都係囝囝，兩個月前肚大如籮嘅Joyce，仲同老公恩愛拍拖出席慈善基金晚宴，當時肥咗15磅嘅佢鬼咁精神，仲話啱啱同老公、囝囝去完夏威夷玩，紀念結婚四周年咁話。Joyce仲喺嗰邊同老公再行一次婚禮，搵埋囝囝做花仔，鬼咁sweet。
已經生咗兩個仔嘅Joyce，出年就踏入40歲，佢講笑話：「已經冇乜力氣再生，追唔追到女就順其自然！」做咗媽咪嘅Joyce專心湊仔，雖然有開微博，但就好少上去玩，就算前日生咗第二胎，都冇喺微博報喜，睇嚟佢生完都好攰，要好好休息吓。