小股東大鬧中國燃氣（384）股東會，搞到爆杯爆碟，警察到場調停，呢間惹來中外股東爭奪嘅上市公司，認真惹火！
王姓小股東（暫且叫佢「王小股」）噚日出席中燃股東會同特別股東會，好似歌星咁換衫出場，第二件衫仲襯番新聞頭條，寫住「誓死捍衛釣魚台」，好明顯係有備而來。
「王小股」喺會上不停發問，質疑公司賬目，管理層十問九唔應，令佢越問越激動，換咗衫出席特別股東會直情走到台前，企喺主席黃倩如面前，工作人員上前攔截，「王小股」反而擔心自己安全，打999報警。
在旁嘅公關姐姐喺呢個時候講咗句「等警察搞掂佢」，「王小股」就突然情緒失控，係咁追住公關姐姐，兩人喺會場內走呀走，好似玩捉迷藏咁。走咗幾個圈，「王小股」又走咗去掟杯碟，搞到一地玻璃碎，其他小股東見唔對路，雞咁腳離場。警察十多分鐘後到場調停，事件先至平息。唔知嗰位公關姐姐有無嚇親呢?
