《名人表態》
國民教育家長關注組邀請名人拍攝一系列短片，呼籲家長參加一人一信行動；歌手黃耀明的短片曝光三天即有三萬點擊率；第二集昨推出，主角是DJ森美。作為父親，他形容接受國民教育科猶如「引賊入屋」。
「首先要有是非黑白」
森美早前參與關注組的聯署聲明，要求撤回國民教育科。他不能接受下一代成為試驗品，「等於陌生人敲門要入屋，到佢個樣似賊，咁你都問清楚㗎。唔通俾佢入嚟試吓先，可能真係補習呢？」他又促請政府「唔好搞我住」，不要強推國民教育科，「未搞掂，我食咗肚痛咁點呢？應該審慎考慮，如果唔係好似大頭奶粉，仔個頭又大，家長就頭都大埋。」
育有一子一女的森美擔心洗腦教育偏頗，窒礙下一代批判思考，「首先要有是非黑白，先懂得批判。覺得世界得一樣嘢，由細到大都食苦嘢，鬼知有樣嘢叫甜咩？」他指愛公司不一定愛老闆，暗寓愛國不等於愛黨，「換咗個老細，佢嘅理念完全唔同喎，咁你仲愛唔愛呢間公司呢？」
他呼籲家長去信學校，了解對國民教育科的立場，「作為家長，關心自己子女喺學校學到乜，係好應份平常嘅事。」
《蘋果》記者