法國喺歐國盃出局後，似乎國家隊隊運都未有好轉，兩大主力列貝利同賓施馬，以為已經告一段落嘅雛妓案突然又死灰復燃，最高刑罰係坐3年監同罰款45,000歐元（約43萬港元）。案中最大關鍵，就係女主角莎希亞（ZahiaDehar），佢如果繼續一口咬定列貝利同賓施馬有畀到錢佢，呢兩位球星就幾難甩身；一旦罪成，列貝利同賓施馬只能嘆句紅顏禍水。
女主角口供成關鍵
法國司法機構周二發出通告，指包括列貝利同賓施馬在內嘅10名人士，同埋一位經營賣淫咖啡店嘅人，因為涉及嫖未成年少女，表示將會開庭審訊，要求有關人士出庭作供，但就無確實日期。講番呢單嘢都已經好幾年，當時年僅17歲模特兒莎希亞，接受訪問時自爆收錢同球星發生性行為；好似09年4月，自己就好似「生日禮物」咁，畀列貝利「慶祝」佢26歲生日，因而收到1,500歐元（約1.4萬港元）報酬，而且更自爆只得16歲時，賓施馬已經多次幫襯佢，每次都有收錢，不過佢就隱瞞未成年身份。
事件爆出後轟動法國，警方同司法機構都要做嘢，上年11月邀請過列貝利同賓施馬問話；列貝利當時委派律師代表作供，堅持自己冇畀錢，而當時完全唔知莎希亞係未成年，只算係「onenightstand」。雖然對已婚兼有兩女嘅列貝利，個人形象已經受損，但總好過坐監。事件似乎就咁擺平，但法國法院方面唔係好信列貝利嘅口供，到時一開庭，列貝利就好難再避。家最關鍵就係莎希亞，佢靠呢單嘢已經聲名大噪，又上電視又出席時裝活動，佢上庭點樣講，都幾決定兩人命運。
罪成最多囚3年
喺法國召妓冇犯法，但嫖雛妓就犯上「與未成年妓女交易」嘅法例，分分鐘要罰款同坐3年監。罰錢就事少，坐監嘅話，列貝利效力嘅拜仁慕尼黑，同賓施馬效力嘅皇馬就好頭痛。新任法國教練迪甘斯就唔想回應，只話：「呢啲係佢哋私事，我只集中對烏拉圭嘅友賽。」