美斯一向畀人笑喺巴塞就無敵，返到阿根廷國家隊就冇晒力。不過呢個情況近期有變，球王喺近幾場國際賽頻頻有料到，周三又有波入，帶領阿根廷以3:1作客擊敗德國。美斯心情大好，就連有球迷闖入球場，要同佢握手都笑笑口配合。
雖然德國陣容不整，但今場波正選陣容仲有高路斯、湯馬士梅拿同奧斯爾等主力，加埋主場出擊，阿根廷要贏其實唔易。主隊喺開賽30分鐘打少個，門將薛拿禁區犯規領紅，不過美斯主射12碼宴客。德國以為大難不死，點知完半場前皇馬孖寶之一嘅基迪拉防守角球時擺烏龍，令德國完半場落後0:1。
阿根廷作客3:1挫德國
易邊後美斯終於發威，禁區頂接應希古恩回傳一射入網；到73分鐘，迪馬利亞遠射奠定勝局，德國只能夠喺完場前破蛋，算係挽回少少面子。
場波完場前仲有小插曲，有個揸住德國國旗嘅球迷衝入球場，走去同美斯握手，心情靚靚嘅美斯亦笑住咁成全佢，之後呢位球迷就好開心咁被保安帶走。同場仲加演假馬勒當拿觀戰，真身家身在中國，但呢位冒牌貨都扮得幾神似，聽講有啲外國記者俾佢呃到㖭。
美斯心情咁好，無他嘅，過去一年佢喺阿根廷國家隊嘅表現，真係非常醒神。自從教練沙比拿接任後，美斯喺10場國際賽入咗10球，其中9球仲要喺最近5場入嘅，終於唔使剩係着住巴塞波衫先識入波。
美斯賽後都係如常咁謙虛，話最開心見到阿根廷近期成績大有進步；至於沙比拿就喜見佢同阿古路喺鋒線配合出色。至於美斯嘅死敵基斯坦奴朗拿度都唔示弱，喺同日國際賽一樣有波入，幫葡萄牙喺主場以2:0擊敗巴拿馬。
