距離英超開鑼得番3日，各支球隊嘅備戰都進行得如火如荼，不過紐卡素領隊柏度家就好頭痕，事關「喜鵲」有半隊主力傷咗，分分鐘唔可以喺今個禮拜六深夜，主場對熱刺場波上陣。咁誇張？堅料定放煙幕先？
根據柏度講，呢一刻嘅紐卡素冇嘢多，就係得傷兵一大籮，好似中場卡比耶、賓艾化、前鋒柏比斯施斯同丹巴巴亞，本身經已養緊傷，上星期六同卡迪夫城場熱身賽後，輸1:4都算啦；再傷埋迪奧迪同高洛仙尼兩位中後場主力，真係灰晒。皺晒眉頭嘅柏度狂呻：「賓艾化嗰膝頭有輕傷，頭一個禮拜肯定唔使預佢。卡比耶睇落都唔係好對路，希望可以盡快操起佢，趕得切禮拜六落場。」
柏度話黑雙煞齊傷
柏度話賓艾化同卡比耶可以落場鬥熱刺嘅機會都幾微，咁好多「喜鵲迷」關心嘅一對塞內加爾前鋒柏比斯施斯同丹巴巴亞又點先？佢兩位喺上季聯賽共射入29球，超過球隊總和嘅一半。無奈嘅柏度就話：「柏比斯嘅大腿有輕傷，我估應該都康復得切嘅。至於丹巴，佢嘅小腿脛骨都傷咗成個禮拜，家都仲未知好番末。」
進攻方面已經大打折扣，好衰唔衰啱啱場友賽又傷多兩件中後場，搞到柏度更頭痕：「迪奧迪整傷咗小腿肌肉，而高洛仙尼踢咗20分鐘左右，個樣好似好辛苦咁。」
對手波亞斯呻冇鋒用
其實柏度又唔使咁愁嘅，話晒紐卡素今屆都密密買人，最新鮮熱辣就買埋阿積士嘅安尼達。呢位23歲荷蘭球員，既可以踢左閘又踢得中場，都叫做係柏度嘅及時雨。
話唔埋柏度都係放煙幕畀熱刺嗰邊，事關波亞斯早前就話球隊唔夠前鋒用，隨時要靠19歲嘅青年軍簡尼（HarryKane）擔正喎。既然係咁，梗係打死都唔畀底牌你睇啦！