海迪覺得利豐（494）可以考慮改名，叫「吹豐（風）」。單靠一個吹字，就成功manage到市場的expectation，馮教授果然係唔同啲。如果利豐冇喺業績緘默期前玩吹風，令幾間大行靜悄悄咁調低咗個盈利預測，公佈業績之後分分鐘唔只跌20%。有長期支持利豐的外資大行分析員同海迪講起利豐，都只識嘆氣，幽幽地吐咗一句：「佢哋（利豐管理層）之前講嘅嘢，出到嚟完全係兩回事。」
利豐最擅長轉移視線，除咗搞個三年計劃令你有具體憧憬之外，每次承諾唔兌現時，都搵另一焦點蓋過去。好似利豐兩年幾前那個吹到超勁嘅Wal-mart大deal，銷售目標年年推遲，每次都話下個年度會開始賺錢，sofar仍未見到。
明知生意唔得，利豐舊年轉sell利潤率復蘇故事，本土分銷業務裁咗員，人工大減，遣散費又俾埋，目標經營溢利率今年可回復到9%水平。但上半年業績出嚟，分銷經營溢利率係0.6%！點只冇復蘇，仲幾近係蝕錢！原因係要投資亞洲平台，同重組美國業務。聽落係咪又好合理呢？華麗包裝固然有用但和實際情況差太遠，始終會露底的。讓「豐」繼續吹......
海迪