馮仁昭四圍超：港姐鬧市拉票趕客阻街 - 馮仁昭

新一屆港姐競選將會喺今個月26號舉行，十位候選港姐噚日喺銅鑼灣宣傳，無綫總經理鄭善強都有去撐場，佢話當晚由評判選完三甲港姐後，再由觀眾透過TVBFun手機程式或者TVB.COM嚟一人一票選冠軍。

陳潔玲傳胞妹惹官非

噚日班港姐出席記者會之後，去咗銅鑼灣同中環拉票，周街向市民派宣傳單張，但市民反應比較冷淡，唔少人一見佳麗走埋嚟以及大批記者影相就即刻彈開避鏡頭。唔知究竟係佳麗吸引力唔夠，抑或純粹啲市民唔想上鏡。現場所見，張鈞美算係比較受市民歡迎嘅一個，佢手上邊啲傳單好快派清光。至於湯洛雯諗住好醒咁走咗去港鐵站口派傳單，但就搞到塞住晒個路口阻人出入，無綫保安即刻拉佢行開。

另外，噚日有人報料話「翻版妍希」陳潔玲個妹妹喺內地惹官非，陳潔玲話絕對冇咁嘅事，佢妹妹以及全家人都喺香港，妹妹細佢幾年，家仲讀緊書。