天不怕地不怕，最怕政治人物扮講人話。
官員打官腔，講等於無講，不打緊，我們最多當聞了一個響屁，有聲而無內容，雖難聞，也就是過眼雲煙；最怕官員扮有人性，扮講人話，那種惡心，就像放了屁還要扮若無其事和人講笑：哈哈，你唔係聽唔出係件衫同張梳化磨擦嘅響聲吖嘩？
陳茂波出來解畫，就是扮講人話。
他說：「全心、全意、全力做好發展局長的工作，以成績報答大家的託付」，等等，我們幾時有把發展局的工作「託付」於你波叔手上呢？聽說你完全是由梁振英挑選的「梁將」，我們香港市民無人以任何直接或間接的形式「託付」任何工作予你。當然我們知道，波叔字典，專捉字蝨，既然「板間房」不等於「劏房」，那麼「託付」也肯定有別解，或許波叔以為，「託付」即「托水龍」，有着數自己獨吞，發展局個位絕不交出。
波叔又說自己「服務香港的心不變」，既然你如此愛香港如此要奉獻自己，何苦糾纏局長之位？繼續留在會計界服務啦，又或者，幫手去沙灘執膠粒，環團說不夠義工啊。
或者你可以再厚黑學一點，「係啊，板間房又好，劏房又好，係租俾人住啊，又如何？佢地有屋住點都好過瞓街啦，一日最衰地產霸權搞到巿民上唔到車，我都係代房署安置巿民咋，呢啲咪服務香港囉。」
波叔青出於藍：先是抄梁振英休假屎橋，未解釋清楚便放假走人，明顯打算「以空間換取時間」，自製過冷河；再者，走佬避風頭，卻拉家人下水，說甚麼陪女兒美國開學，又要探望患病老人，說「天下父母心」。
波叔探病時只要不提自己做官的糗事，包老人家很快便康復；至於女兒開學，咁大件事，你可以慢慢陪，陪到個女大學畢業搵埋嘢做，不用回來，免得女兒知道自己有一對大話精父母，教壞細路。