陳奕迅和太太徐濠縈近期分別因偷拍事件和惹火新歌，遭內地網民圍剿。陳慧琳（Kelly）昨日出席活動，透露自己有一套應對方法，被明影就接受，被偷拍就扮不知，十分看得開。Kelly最着緊當然是一對囝囝蝦餃仔、小龍包，四個月大重磅小龍包抱到她腰痛要拉筋，但見到兩兄弟親親，Kelly心都甜，談到千嬅抱B扭親手，即笑言太誇。
陳慧琳昨日在中環出席擔任代言人的手錶活動，又為婚紗騷頒獎。近期日本嬰兒奶粉爆出缺碘事件，全城媽咪怕怕，Kelly也有關注：「我哋就一直都跟醫院食美國牌子，希望暫時冇影響啦。」
「可能係大B」
Kelly謂有定期帶小龍包去檢查，不會特別擔心：「小龍包家四個月，成18、19磅，超晒磅，抱得多手痛，連腰都痛埋，一抱完就要挨埋張床度拉筋。」提到千嬅抱B扭親，Kelly忍不住笑她誇張：「太誇喇，千嬅個B可能係大B，佢又新手啦。」
昨日Kelly穿上StellaMcCartney長袖連身短裙，消瘦不少，看來已經成功收身，但千嬅就keepfat多過keepfit，Kelly說：「我都未收晒身，仲有幾磅，不過慢慢嚟啦，唔會地獄式減肥，唔想個胃太辛苦，家着得番舊衫都好happy，之前都要着鬆鬆哋嘅。」她謂老公本來陪她一齊減，但一直沒行動keep着肥美身形。
談到蝦餃仔對細佬十分關心，Kelly講起都心甜：「有時細佬喊，蝦餃仔會同佢講：『唔好喊啦，唔好喊啦』，好caring。」她又爆蝦餃仔沉迷奧運看體操：「佢仲成日喺地下轉轉轉，仲學埋舉重㖭。」
明影偷影都得
近期陳奕迅（Eason）新歌《非禮》疑唱衰強國人被圍剿，Eason嫂徐濠縈之前被偷拍微博鬧爆，惹來10萬網民大反應，Kelly說：「網民成日都鬧人，我都成日俾人影，但冇得介意，始終係公眾人物，唔係跟住我嚟影，都接受㗎，如果偷影嘅，我咪當唔知算。」
採訪、攝影：林嘉慈
