「有人辭官歸故里，有人漏夜趕科場。」最好就用嚟形容阿仙奴嘅尹佩斯，同埋利物浦嘅安祖卡路爾。個心飛咗去曼聯嘅尹佩斯喺周日為兵工廠嘅友賽後備上陣，被球迷狂噓，由球隊英雄變成反骨仔；而盛傳會被紅軍踢走嘅安祖卡路爾就盡最後努力，在友賽攻入一球，寄望領隊羅渣士准許佢繼續留隊。
尹佩斯落場廠迷勁噓
阿仙奴禮拜日喺德國同科隆踢咗場友賽，新加盟嘅「科隆王子」普多斯基首次為兵工廠披甲，正選倒戈母會，就個人梅開二度；加上華美倫及謝雲奴都有入球，結果阿仙奴以4:0贏波。
呢場波最值得一提係70分鐘左右嘅換人，已經入咗兩粒嘅普多斯基被調離場，由尹佩斯入替，遠道而嚟嘅1,500個廠迷高呼普多斯基個名，而尹佩斯入場後就被狂噓；睇嚟上季嘅槍王已經變成過街老鼠，而初嚟甫到嘅普多斯基用一場波就做咗球迷寵兒。唔好怪人貪新忘舊，邊個係人，邊個係鬼，球迷睇得好清楚嘅！
據報曼聯遲遲都唔肯將轉會費提高到2,500萬鎊（約3億港元），搞到家尹佩斯進退兩難。賽後記者又係問尹佩斯嘅去留，領隊雲格回應：「冇咩關於尹佩斯嘅新聞，我都冇咩特別嘢好講。我從來都冇諗過買人頂佢，我一直都覺得佢會留隊，所有嘅收購，目的係要嚟再加強球隊嘅實力。」至於兵工廠嘅新英雄普多斯基就好識班廠迷，「聽到阿仙奴嘅球迷叫我嗰名，我覺得好驚喜，好正呀！好開心第一場上陣就入兩球，我完完全全覺得自己係阿仙奴嘅人。」
卡路爾入波博留隊
另一場友賽，利物浦就喺主場靠17歲翼鋒史杜寧（RaheemSterling）、巴西中場盧卡斯同安祖卡路爾各入一球，以3:1擊敗利華古遜；其中安祖卡路爾入嗰球係遠射，對手門將甩手漏入。領隊羅渣士賽後都幾滿意安祖卡路爾嘅表現，話佢呢球射得幾靚。不過，留唔留到隊，仲係未知之數，安祖卡路爾加油呀！