無端端發生兩隻日本奶粉「缺碘」事件，森永、和光堂兩個牌子含碘不達標（按：香港食物衞生局標準係：每100千卡奶粉應含有10-60微克碘），只達世衞標準三分之一，即五微克（按世衞標準：每公斤體重每日攝取15微克碘），故此呢兩隻奶粉立即回收。
報紙於是大字標題報道，講到日本和光堂、森永奶粉食懵B，咪話唔得人驚。電台名嘴青姐有位乖仔，精靈到不得了，在青姐精心教導下，成個明日之星咁款，呢日一早碰到青姐，問佢：「你好似曾經周圍撲日本奶粉嘅噃，係乜牌子？有冇中招？」青姐答：「大大聲講都得，冇中招，我個仔食森永奶粉大嘅，驚都未驚過，日本奶粉一定係少啲碘嘅，因為日本人日日飲麪豉湯紫菜，食海產，吸收大把碘，唔需要在奶粉加多啲碘。美國奶粉就多碘嘞，因為中西部美國人只見山、不見海，好少食海鮮㗎嗎。」
呢位媽咪分析奶粉含碘，好似分析股票咁細心，唔似一啲師奶一味賴政府，埋怨政府「現時才驗，有冇搞錯！」原來香港的家長有常識到極，電視台在報紙新聞出街之日（八月九日）到街頭採訪，根本全城安靜，毫不恐慌，一啲家長照買日本奶粉，到母嬰健康院為嬰兒驗血之人士亦甚為稀疏，十間健康院只有59位BB驗血，足見香港媽咪好老定，好有常識，恐慌嘅只是旁人。
後來與退咗休在家湊孫湊得不知幾高興嘅財務B（女士）傾過電話講股票，探討邊隻Reit最好，原來佢睇咗《壹週刊》林本利教授專欄講「回購領匯誰人最獲益」，佢認為林教授有好多數字支持，陳婉嫻等回購領匯派只係隨口噏當秘笈，佢學林教授咁已擁有領匯基金單位收息，佢話：「領匯俾陳婉嫻等人唱回購，唱到價錢好高，駛唔駛趁高套現換馬，買另外一啲更高息嘅Reit呢？」左丁山唔係青姐，唔敢講咁多寫咁多，只係同佢交換意見而已，臨收線順口問句：「你個孫食乜奶粉呀？」財務B話：「六個月大，換過兩隻奶粉咯，最初食美國奶粉，唔知點解會『結恭』嘅，petpet損晒，新抱改餵日本奶粉，就冇呢個問題，食衞局依家話日本奶粉唔夠碘，但新抱就話日本奶粉有更多DHA。」DHA係乜東東？碰啱八月十日《爽報》有篇廣告提及DHA，睇完就增加常識。左丁山叫財務B唔好研究Reit住咯，研究吓奶粉先啦，投資落個孫度就係真真正正長期投資呀！