第一眼望到Ultrasone「羅密歐與茱麗葉」特別版耳筒，不禁注目凝神觀賞；高貴不浮誇，造工精緻，耳臂位採用矜貴罕有嘅釕金屬，寓意情比金堅，特別版更搭上莎劇名著「羅茱」Concept，鬼咁浪漫。就算唔係音響發燒友，癡男怨女都會被佢深深打動。
記者：韓繼聰
攝影：潘志恆
模特兒：Lincoln、Fiona
羊皮配貝殼紋 貴氣
其實Ultrasone的Edition8耳筒系列，一早已經喺Hi-end耳筒界享負盛名，由09年推出至今，已經有Palladium及Limited特別版，今年就剛推出一對「羅密歐與茱麗葉」版本，大玩情侶浪漫Feel。
黑色嘅羅密歐版用上炭灰新色，極具剛陽味，好型仔！但茱麗葉版卻更搶眼，外殼以稀有釕金屬（Ru）打造，並以鮮艷粉紅色「埃塞俄比亞羊皮」鋪上頭墊位及耳罩，貴氣美觀，戴起嚟更覺透氣舒適。耳罩設計也極花心思，簡約「S」形拉花，配上珍珠色貝殼物料點綴，每隻耳筒不盡相同外，亦倍添少女味道，難怪連Model都戴到唔想除低。
唔同歌換唔同線 靈活
咪以為Ultrasone係咁意改吓外形同顏色咁無誠意，據產品經理Seaman講，原來「羅密歐與茱麗葉」新加可換線設計，發燒友可按照聲音喜好，選擇不同線材配合，增加靈活性也減少線位磨損。
耳筒採用40mm鍍金單元，播放聲音靈敏反應快，聽高頻特別敏感，音色細緻，還原度高。再加上Ultrasone自豪的S-Logic技術，把耳筒單元擺位靠前，貼近日常聆聽效果，營造出更自然及具空間感的聲音。
查詢：毅智科技（31880767）
