瑞銀消費股分析員梁裕昌（Spencer）贏晒啦！Spencer舊年5月出咗份報告唱衰利豐（494），指利豐收購項目嘅入賬方法，喺新會計準則下顯得吊詭，即刻引來利豐出通告反擊。
之但係，利豐上星期公布嘅中期業績正好反映Spencer觀點正確，雖然隔咗年幾先平反到，利豐又未跌到Spencer所定嘅至低價9蚊，但佢條氣應該順晒。
聽聞舊年利豐大戰分析員時，唔少基金朋友都勸Spencer見好就收，即使知佢有道理，都唔使咁大膽寫晒出嚟。唔聽話嘅Spencer就話之你，認為啱嘅嘢，無理由唔寫，仲好瀟洒咁話：「時間會證明一切！」
Spencer今鋪雖然贏咗，但都唔使飄飄然，投資者亦唔使當佢係神，事關佢今年3月叫買嘅歲寶（312）捲入民企風暴，家陣仲停緊牌。講到底，研究報告都係參考吓好喇。