美國紐約州金融服務廳發功，力砌英國渣打銀行，政府報告用到欺騙（deception），流氓（rogue），欺詐（fraud），全力隱瞞（staggeringcoverup）呢啲字眼，十分有傷害性，對慣於低調嘅英國賓架來講，當然受到震撼，唔怪得一位渣打高層對「金融時報」講：「好似睇JohnGrisham小說。」啱啦，暑假仲未過，渣打大班主席去咗佛羅利達州渡假，已經急急返回倫敦應付此事，行政總裁冼博德（PeterSands）亦取消假期回朝救亡。唔知佢兩位放假在沙灘享受陽光與海灘之時，有冇帶住兩三本JohnGrisham嘅小說呢？
左丁山屋企就有十幾本，有時同一本小說會有兩本，因為老婆上機飛去曼谷時買一本，阿仔自己去北海道時又買一本，大家都喜歡睇，人人都喜歡睇，故此Grisham係二十年來最暢銷嘅流行「法律小說家」，搵錢比佢做律師時多咗唔知幾多倍。靚仔湯告魯斯（真係靚仔之時）嘅電影TheFirm（糖衣陷阱1993）就係改編自呢位先生嘅1991年成名作。近年有金融海嘯，歐債危機，LIBOR操控醜聞，墨西哥毒販用飛機快艇運現錢入美國等等近乎小說情節嘅真人真事，相信Grisham吸收到大量靈感，遲啲就有呢類題材，寫衰賓架嘅小說發表。
紐約州指控渣打違規，睇真啲，與美國當局指控滙豐幫墨西哥商人洗錢有分別。商人（或是毒販）洗黑錢，屬個人企業行為，各國法律皆嚴禁。但紐約州指控渣打與伊朗銀行/企業做生意「洗黑錢」，伊朗係合法國家、聯合國成員，只因有意建立核武，引起美國敵視，要加以經濟制裁，在財務交易上趕絕伊朗而已。英國法國德國等等唔敢反對美國，但並無真心參與制裁，其他國家（中俄印巴非洲南美洲等）就睬美國都儍，而伊朗每年輸出石油十億桶以上，無油國家爭相購買，咁樣每年伊朗賣油收取嘅千餘億美元，去邊度結算？咪又係透過中俄印巴杜拜啲銀行！渣打只係其中之一，紐約州唔通唔知道？只敢打擊一間在英國本土唔算大嘅銀行？無怪英國傳媒質疑紐約意圖打擊倫敦金融中心地位，係想紐約獨尊！