立法會金融服務界議席家陣有五個人爭（張華峰、李君豪、甄文星、林德明、鄧予立），七大證券業組織嘅搞手即刻做嘢，暫定今個月28號6點喺中環港交所（388）展覽廳搞一場選舉論壇，畀五位參選人同場較量，講吓可以為業界做啲乜嘢。
一場選舉團結九個會
七大證券業組織近年越行越埋，經常合作搞活動，春茗之外，今年初選特首，金融服務界選委有18票，七大券商組織亦喺港交所展覽廳搞咗場選舉論壇，唐唐同CY前後腳出席。
今次呢個立法會選舉論壇，除咗七大券商組織之外，仲有貴金屬同業協進會同香港證券及期貨從業員工會參與，夾埋九個會都會派代表做籌委會會員，以示公平。唔知經過呢次合作，七個會每月嘅定期聚會，會唔會變成九個會呢？咁佢哋又會唔會越嚟越團結？牙力越嚟越大呢？