上嗰禮拜六舉行嘅女子韻律操個人全能決賽，攞銅牌嗰位白俄羅斯靚女查卡舒娜，原來佢係已婚人士，丈夫係效力明斯克戴拿模足球隊嘅莫拉舒高。
MBA考起徐嘉樂
雖然查卡舒娜貴為人妻，但由於樣貌似足混血名模AmandaS.，自然引起大家嘅注視，就連電視台班主持都特登講多兩句。但勢估唔到主持之一嘅陳恩能（丹尼爾），一句MBA（MarriedButAvailable，即已婚但仍可以拍拖）考起咗徐嘉樂，仲搞到deadair㖭，節錄部份對白畀大家睇吓：
丹：唔怪得呢位白俄女子運動員會有用腳踢波呢招，因為佢有個足球隊國腳老公！
徐：不過丹尼爾咁講，令到好多香港觀眾冇咗希望。
丹：都冇所謂嘅，所謂MBA㗎嘛！
（一陣笑聲，跟住deadair3秒）
徐：係咩嚟㗎？
丹：知就知，唔知就算喇，我哋去廣告先！
唔知最終丹尼爾有冇私下解釋番畀徐sir聽呢？