睇倫敦奧運除了睇一班靚仔靚女運動員外，多虧廣告日播夜播，又唱又跳的日韓女子組合GirlsKingdom應聲彈出，儘管國籍語言唔同，但審美眼光卻無分國界，只因她們一見日產GT-R已雙眼放光，更異口同聲話「如果我男友揸GT-R就好喇！會加佢分！」
記者：李鑒泉
攝影：伍慶泉、楊錦文
姑勿論你鍾唔鍾意，但一句唔鹹唔淡嘅對白，足以讓GirlsKingdom五個成員成為談論焦點，這隊日（松岡李那、田代麻衣、久保杏奈）韓（蔡恩真、朴喜秀）女子組合，料不到廣告播出後反應這麼大。蔡恩真笑指自己在港鐵看到廣告時，乘客卻認不出她，「有一刻真想跟他們說我就在廣告中呢！」
愛大馬力跑車
原以為她們出入不是坐保母車就是的士，對汽車認識有限，但說車經時卻頭頭是道，如松岡李那就愛在東京駕着福士開篷甲蟲車四圍去，還試過因為眼瞓撞車，「嗰次做完嘢之後太眼瞓衝紅燈，結果撞到另一部車，好彩車速唔快，大家都無事，但都嚇到一排唔敢揸車！」雖然未有香港牌，但松岡李那已急不及待想試車，「大引擎，我鍾意。」GT-R有3.8公升TwinTurbo引擎，配合六速雙離合器波箱，爆發的550匹馬力不容輕視。父親賣車的久保杏奈，自細已經跟爸爸睇賽車，所以都試過唔少車，而且她更自認是《頭文字D》頭號粉絲，「我好鍾意拓海，第四輯中星野好造的R34也十分快，我尤其鍾意GT-R的引擎聲，如果我男朋友揸GT-R來接我出街就好了，即刻加佢分！」與R34比較，R35不僅換了引擎，就連賣相也來得惡形惡相，如巨型鬼面罩、20吋輪圈等，而且廠方為新車重新編寫電腦程式，比初推出時更易掌控。提起GT-R，同久保杏奈一樣鍾意聽引擎聲的蔡恩真表示，自己擁有的第一台車就是日產Skyline，「我以前男朋友是賽車手，我們經常討論不同車款，但我還是對日產情有獨鍾，除GT-R外，Fairlady也是我的至愛。」不過轉頭她又指揸GT-R的男性太花弗無安全感。看來，女人都是矛盾的。
斯文得，狂野又得
對大部份女性而言，舒適度比性能來得更重要，「栢皮內櫳感覺好有跑味，而且桶椅也很舒適，不過對我而言，後座可能小了些，如果能像SUV這樣寬闊就好了。」GT-R定位為四座位跑車，後座對身形甚高的朴喜秀而言可能逼了些，但已比很多跑車來得舒服，加上四輪驅動，車身過彎時擺動不算大，乘客唔會有得震無得瞓。因為拍攝那台日產GT-R是入口版本，中控台的七吋WVGA屏幕屬日文介面，田代麻衣玩得不亦樂乎，更大讚那個有9.4GB容量的硬碟能儲存她的心水靚歌，仲話可以返工揸都無問題。說穿了，日產GT-R是一部能夠兼顧通勤飛車瓣瓣掂，就如GirlsKingdom一樣，除準備新歌外，五個成員更身兼多職，朴喜秀開班教化妝、蔡恩真做才女出書講瘦身、田代麻衣拍廣告、松岡李那及久保杏奈拍電影等，百足咁多爪！
NissanGT-R
引擎：3,799ccV6雙渦輪增壓
馬力：550ps/6,400rpm
扭力：64.5kg-m/3,200-5,800rpm
傳動：六前速雙離合器自動波箱，四輪驅動
售價：$1,579,450起
查詢：28776700（富利堡）
