蘋機會：大Note神奇SPen　筆挑蘋果

三星喺5.3吋Note度力谷嘅SPen，揸筆操作居然極受玩家歡迎。好嘢自然要添食，加大碼10.1吋Note即將推出，為挑贏蘋果iPad，繼續喪加SPen功能，好似繪圖、手寫算式等，揸支筆絕對精準過你隻食指！

記者：許福合
攝影：陳盛臣

大芒一開二　播片兼上網

自從Note的興起，唔少用家都愛畫畫吓，對屏幕尺寸自然有要求，甚至有人嫌5.3吋Note的大芒都不夠用。於是新Note拉闊到10.1吋，無論係畫公仔定係寫訊息，自然都無咁逼。可惜的是解像度只有1,280×800，唔算突出，但在加入平板的「殺手級」功能MultiScreen，實用程度絕對係升幾級。開啟後，可將屏幕一開二，一邊播片、一邊上網等，最實用係上網見到有趣的圖片文章，都可即時剪貼到另一邊的SNote上，比現時平板常要反覆轉Apps方便得多。

■畫面可一分為二，邊上網邊寫電郵，相片仲可即時拖過隔籬。

■現場豪氣地安排了超過20部試玩新機。

順滑行四Apps

機能方面，亦升呢到四核心處理器，除咗眼見一般Apps操作更加順暢爽快之外，亦可以用到GSIII的PopupPlay，睇住片都可以瀏覽網頁同回覆短訊。筆者就試過利用MultiScreen，加上MiniApps及PopupPlay，同時跑四個Apps，畫面都唔覺窒，再加上新設計鍵盤，可按需要分配到不同的屏幕，用起來更似電腦！
Note10.1已預載Android4.0.4ICS，毋須估估吓有無得升級，而喜歡Root機嘅用家留意，網上傳緊Note10.1已可Root機，用家可突破Note限制玩個人化了。不過機都未出，仲可能喪失保養，Root前要三思。