如果要選英超球壇最唔受歡迎嘅班主，紐卡素嘅艾殊利（MikeAshley）一定榜上有名，因為不時傳出佢「闊佬自己、孤寒球會」嘅新聞，加上佢又肥頭耷耳，好似好懵咁；不過，原來肥佬班主係面懵心精，最近佢就打算借出9名紐記球員畀蘇格蘭褪色巨人格拉斯哥流浪，以買入格流嘅股權。
願借9紐記兵換買股權
曾經係蘇超班霸嘅格流因為財困，今屆被貶至蘇丙作賽，而陣中好嘅球員都走到所剩無幾，唔怪得之喺上周六作客彼德赫特（Peterhead）嘅蘇丙首戰，都只係可以打和2:2，搶得1分咋，都幾冇面。眼見格流需要人用又冇錢買人，艾殊利就出手，話願意借9名喜鵲嘅球員畀格流，條件係要畀佢買入格流嘅股權。
好明顯，肥佬班主話幫格流係假嘅，佢嘅真正目的只係想食咗呢間有140年歷史嘅老球會啫！而且，如果呢宗交易真係成事，艾殊利擁有嘅SportsDirect公司，仲會代理埋格流嘅球衣銷售㖭，又可以多賺一筆。
不過，你精我都唔笨，蘇格蘭足總為保障佢哋麾下嘅球會，就講到明艾殊利唔可以擁有多過格流10%嘅股權，同埋佢唔可以喺格流擔任任何職位，先至會批准呢次交易。格流領隊麥哥斯亦話裏有骨咁講：「我對今次可能嘅交易感到好興奮，因為艾殊利睇嚟係一位好精明嘅生意人，如果佢可以將管理球會嘅經驗同埋自己嘅財富帶嚟畀格流，咁就一定可以推動格流向前嘞！」