之前有報道指，美國運動員喺倫奧攞牌所得嘅獎金，係需要繳稅畀政府；相比之下，中國運動員就幸福得多喇。根據中國稅務規例，國家同國際組織發放嘅獎金，可以全部免稅，其他來源嘅獎勵同捐贈，先要以當中20%交稅；除咗體育總局承諾發放嘅獎牌獎金之外，運動員亦可能收到所屬省份嘅錢，好似易思玲（圖）咁，收咗50萬人仔金牌獎金後，仲有廣東省方面畀嘅100萬，全部免稅。