組合的命運似乎離不開不和、拆夥及重組，很多組合就算明明沒有不和都會「被不和」。事實上艾粒一起十年，從沒有吵過一次架；達明一派雖然多次被指不咬弦，最後都是再次走在一起。其實作為樂迷，懶理當事人究竟是否真的不和，最重要的是有機會看到偶像同台演出。
撰文：李珮洳
達明一派為慶祝25周年四月時舉行四場演唱會，本月18、19日再於博覽館舉行Part2「返嚟就郁」。演唱會後不少人都覺得達明演唱會是一個完全屬於香港人、代表香港的演唱會，今次明哥更希望邀請特首梁振英及所有官員一齊來欣賞，可惜目前為止只得到林鄭月娥司長辦公室回覆有事未能出席。
演唱會諷刺時弊
如果有看過Part1演唱會，一定發現到很多達明的舊歌都可以配合現時的環境，究竟是歌曲長青還是社會沒變？劉以達以一個音樂人的身份回答這個問題，他說：「作歌好多時都係時勢造英雄，大家聽番覺得家仲啱聽，我當然好開心啦。」但明哥卻有另一番見解：「啲歌聽到家大家都鍾意，當然好開心，但值得反思嘅係個社會其實係咪根本冇進步？」講社會政治又怎少得《排名不分先後左右忠奸2012》最新版本，新特首、新官員上場以及李旺陽「被自殺」似乎都是熱門的取材。
大家都記得明哥四月時在舞台上承認自己是同性戀者，自此不少雜誌追訪他另一半的身份，明哥希望大家不要抹煞他原來的用意：「人點都會有好奇心，但我講呢件事出嚟唔係想大家去發掘邊個係我另一半，我最希望係幫到同性戀者去爭取應有嘅權利。」
公開性向有吉士
坐在身旁的阿達隨即表示會支持明哥所做的一切，他說：「佢講咗出嚟家舒服咗，我真係好欣賞佢嘅坦白，做人要講出真相唔係一件咁易嘅事，仲要企喺台上向住咁多人坦白，真係要好有膽量。」講到新大碟，明哥說：「家個市場夾硬出碟都冇意思，加上我同阿達都有自己嘅工作，咁有時間同埋配合時間需要做單曲，係最好同最快得到回應嘅做法。」
艾粒09年宣佈暫時解散，三年後他們組成十周年，為了答謝fans，二人再次重踏舞台，並多次強調今次真的是最後一次，所以呼籲支持他們的fans要買飛入場，否則會錯失機會。
堅決解散不重組
不過重組是否等於正式解散？艾粒的少爺占及Donald於本月23至28日，於演藝學院舉行六場「艾粒一百週年回歸TenMeMe」，今次是二人最後一次開騷。阿占表示09年時曾宣佈是艾粒的最後一次，但之後有人提議他們十周年再開一次：「好多組合都會喺十周年搞吓騷，咁我哋book到場咪又搞吓囉，不過今次之後真係唔想再做啦，唔係我哋怕悶，亦都唔想做嘅嘢重複，同埋怕入場嘅人覺得悶。」
Donald強調今次演出絕對不會再扮女人：「真係扮夠啦，我都唔想睇自己扮女人，八月我哋真係會宣佈艾粒正式解散，fans真係要把握呢次機會，之後想睇都唔知再有冇咁嘅機會。」
為了答謝fans，艾粒決定盡地一煲爆大鑊，Donald表示會自爆情史：「我會講我點玩女啦，同埋飛女無數，呢啲事係我讀書時發生，但係我相信都冇人信㗎啦，同埋我會揀我老婆唔去睇嗰場先講。」
爆大鑊出賣朋友
阿占就考慮爆藝人朋友、電台以及電視台的秘聞：「我講感情事應該冇人想知，咁多年都係同一個，至於爆邊個藝人嘅秘密仲未決定到，怕家諗定到時就唔update。」
此外，艾粒會邀請一齊開咪的鄭裕玲（Do姐）擔任嘉賓：「我好希望Do姐會以觀音造型上台，因為喺我哋心目中觀音大士咁多年只有Do姐同趙雅芝兩個，同埋好想請Juno（麥浚龍）同佢哥哥去睇，冇佢哋就冇艾粒。」
化妝：死魚眼（艾粒）、KrisWong（達明一派）
髮型：光頭佬（佛法無邊）（艾粒）、JackyMaofHeadquarters（達明一派）
場地提供：人山人海