中國體操男子隊喺倫奧成績唔錯，四川小子馮喆算係最豐收嘅成員之一；除咗男團金牌外，亦贏咗雙槓冠軍。個樣帶點儍氣嘅馮喆，原來份人成個小丑咁，好鬼馬；又經常喺自己微博度發表搞笑言論，令佢人氣急升，關注佢微博嘅網民，已經有接近300萬人咁多。
馮喆花名叫做「小胖」，相信係因為佢睇落肥嘟嘟。閒來馮喆都鍾意上去自己個微博度留言，當中有唔少係佢啲鬼馬嘢，連體操隊教練黃玉斌都成為佢整蠱對象。馮喆喺微博度寫：「可憐嘅黃教練搞唔清楚倫敦地下鐵地圖，佢用咗兩日時間去繙譯晒啲英文地名同用鉛筆寫低，我趁佢瞓咗覺就去擦走晒佢。」
另外，佢又用南韓人嚟開玩笑，話要分清楚邊個係南韓體操運動員好容易，如果佢喺度不斷向裁判投訴就肯定係。
同阮馬素鬥靚仔
馮喆喺周二為中國隊贏雙槓金牌，同場對手有德國靚仔阮馬素。雖然馮喆技勝一籌，但佢都知要比靚仔嘅話，實輸十條街，壓力好大。馮喆話：「我臨出發去出戰決賽之前，特登花多20分鐘去搞搞個髮型，點解？同德國帥哥比賽，點可以唔搞得靚仔啲呀？」
完成所有奧運賽事，馮喆同埋體操隊已經返咗中國，喺周四就到北京機場。負責接佢嘅成都體校工作人員話，馮喆已經攰到飛起，出戰倫奧除咗要應付練習同比賽之外，仲要負責搞gag引大家笑，真係要唞一唞喇。馮喆果然係中國體操隊嘅開心果。
