恒基發展（097）大半年打橫行，呢家超級現金牛，有得諗吓。恒發上年底止，揸住嘅現金達到13.6億銀，一個斗零嘅借貸都無，計計數，每股淨現金高達0.45元。而恒發呢大半年橫行，兼貼近半年低位，現價講緊幾多？係0.57元。每股淨現金值相等現價近八成比重，係超級現金牛。又恒發家陣除咗祖國單一公路項目，再無重大資產或業務。呢期市場憧憬安寧系變身，狂炒主打安寧（128）及丹楓（271）。恒發既係大孖沙四叔系內成員，亦一樣具備變身嘅可塑性。BeforeThat，恒發金多，業績唔點走樣，相信繼續Keep住唔錯派息，食息亦有得諗。住0.54元橫行底兜轉，博上番橫行頂0.66元，回報率22%，PB一倍多少少，唔太過。
保華殘到爆值撈
保華集團（498）上年以18.5億港銀，成功出售祖國洋口港絕大部份權益，成功為項目增值變現，兼避過環球經濟衰退，眼光獨到。再有新搞作前，集團最新NAV一蚊，現價（0.174元），喺三年低位，跌到只有NAV一折幾水位，殘到不得了。呢轉冷灶煲一煲，博保華升兩成到0.21元，到時嘅NAV折讓，仲高達79%。
錢雋