小弟係個包租公，托賴入市時機好，今時單靠收租，都叫做三餐溫飽，唔使受人二分四。最近聽到好多人話租金越來越貴，業主大幅加租等同趕人走，所以我想分享吓包租公的諗法。
我有個單位，租咗畀一位IT公司盛女員工，租咗八年，由初時7000蚊，到最近佢退租嫁人，最後一份約先至加到7500元。家再放租，無萬一蚊唔好搵我。即係話，呢幾年來收租係極之低水。
點解我肯平租咁多？無他，單身女仔住得企理，多年來好少煩我，交租又準時，見到面有講有笑，租生不如租熟，佢唔話走我都唔會趕佢。呢個正係包租公心目中的優質客仔。
反觀另一位，講起我就想鬧佢祖宗十八代，換個燈膽、批蕩甩咗一忽、水龍頭唔夠猛，真係日日新鮮，見親佢嘅來電顯示個心都會一沉。佢話呢啲係租客嘅權益。係，你啱，所以我堅持我有唔續租的自由。
查實，香港人係好怕煩，只要順順利利開開心心，少收一千幾百真係好閒，收番單位裝修、放畀經紀行都要使錢，仲有丟空風險。如果你業主開出一個極之「趕客」嘅續約價，你或者要檢討吓嘞。
讀者 包租恭
本欄園地公開，歡迎各界來信，以450字為限，請電郵至mailto:[email protected]，
註明《家》樓民講場，請留聯絡電話。編輯保留文章的刪減權。