美國紐約的金融服務廳指控渣打銀行與伊朗做生意、洗黑錢，銀碼高達二千五百億美元，違反美國制裁伊朗與洗黑錢法律，威脅撤銷渣打銀行之美國牌照，渣打銀行當然否認指控，指出一早已經與美國當局商討有關指控，非常合作咁話。可惜呢，美國大聲，渣打小兒科，紐約州出一句聲，已令渣打銀行股價大跌，股東遭殃。
基金W對此感到憤憤不平，好同情渣打，佢認為美國過於霸道，要全世界遵守美國法律，美國法律就係世界法律，金融機構為咗合規（合乎美國法規），增加大量成本。但基金W認為伊朗係一個合法國家，與不少國家有正式邦交，以美國為首既西方國家杯葛伊朗係一回事，中國及其他國家繼續承認伊朗嘅話，其他國家點解唔可以同伊朗銀行往來做生意，有乜證據證明伊朗一啲外貿機構係恐怖份子？不過講到尾，基金W還是嘆一聲：「美國之真正霸權在於美元，美元在世界貿易、外滙儲備、旅遊流通方便，目前有無可取代嘅地位，大家唔用美元結算唔得。歐債危機日益深化，美元滙率就升上去，足見要求世界上只有一隻世界貨幣嘅話，就是美元。而美元之結算中心就係紐約，銀行冇紐約牌照，或被美資銀行及紐約州命令禁止渣打銀行交易嘅話，咁渣打所有啲外滙交易、貿易融資結算就會遇上幾乎無可克服嘅困難，等於廢咗一大半武功，睇怕最後都係要向美國投降，繳交罰款，自打幾巴掌，方能了事！」
基金W又話美國法律反洗黑錢反逃稅，十分嚴苛，所有外國基金，只要有一個咁多美國人客戶嘅話，就要向美國監管當局申報好多資料，煩死人，故此佢好想勸走一啲美國客，叫美國人幫襯番美國基金！
美元獨霸天下之局面，未來十年都睇唔到有乜可能改變，因此世界各大小銀行即使覺得委屈，仍要遵守美國法律。有趣的是，美國立會仍未指控中國國營銀行，例如中國銀行，唔通係欺善怕惡？還是白宮與中南海早有默契，唔想天下金融大亂？