物業Ｙ兩星期前去咗放假，在布吉島蘇梅島陽光海灘hea完就到曼谷享受按摩及購物（土產非名牌），返到嚟，知道陳茂波正式接任發展局局長，即刻有單「妻子劏房」事件，搞到灰頭灰面。物業Ｙ來電話：「有云山中方七日，世上已千年，點解香港咁多事情發生㗎，日日新鮮嘅？依家好似要搵聖人做局長先至得，商界人士好似我咁，邊會係聖人吖，出道三十餘年，唔信會冇炒過一兩件貨或者到曼谷沖涼嘅，平時冇人講，一聲做官就見晒頭版，死得啦，商界人士無人可以做大官，不如都係搵番公務員升上去做局長，少啲機會死火！」公僕又點呢？麥齊光夠係能幹公僕啦，死得仲快。
問物業Ｙ：「喂，聽聞CY特首去咗蘇梅島渡假，有冇機會撞到你位老友呀？」物業Ｙ話：「冇冇冇，雖然識佢三十年，今日唔敢高攀咯。我所擔心者就係香港政治陷於僵局，施政寸步難行，你睇，香港機場第三條跑道還要做環保諮詢，將來或有司法覆核，三四年後都未必可以開工，人地廣州白雲機場興建第三條跑道已在八月三日開工，2014年落成，講到2015年至2020年可能建成第五條跑道，客運量每年可達八千萬人次，超越香港咁巴閉，到時香港仲有乜空運優勢，人地起第三條跑道要188億元人民幣，我地就要千幾億港紙，唉，點爭呀！」
估唔到物業Ｙ放假回來就講啲咁正經嘅嘢，仲話擔心香港失去競爭優勢，下一代年青人（三十歲以下）唔知點樣搵工做㖭！左丁山：「自求多福啦，現在香港人心有變，下一代講環保多過講發展增長，講懷舊保育多過講建設新事物，講西班牙法國旅遊飲食八卦多過講歐債危機，我地唔理得咁多嘅嘞，只好在家庭內確保自己下一代有語文及知識競爭力，搵工做唔會爭輸俾人！」物業Ｙ話：「咁就叫你個仔做泥水工人啦！」何出此言？原來物業Ｙ放假前，搵佢間公司嘅判頭替佢在住宅做大型維修，主力係廚房、浴室與客廳，點知返到嚟，工程仍未竣工，間屋立立亂，逼住要住多一個禮拜酒店。撞火之餘，搵判頭嚟鬧，判頭話：「Ｙ先生，你鬧都冇辦法，周圍搵唔夠工人開工，油漆佬，泥水佬嚟兩日走一日，已算俾面我，全香港都唔夠三行工人，年輕人又唔肯入行，有乜辦法吖！」