本月底33歲嘅商台DJ朱薰前晚喺理工演出舞台劇《愛可以多狗》首場，佢自爆同老公Mr.成員Dash嘅孖生兄弟譚健榮造人成功，現時懷孕4個月。
不過朱薰前晚着鬆身衫未見佢肚凸凸，佢老公都有嚟捧場，朱薰喺台上話劇本好神奇，話佢有BB要乜有乜，喺台上嘅演員都第一時間恭喜佢，佢亦感激劇組對佢非常照顧，朱薰接受訪問時話：「呢個古仔都話我有BB，估唔到咁真，老公有車出車入陪我，導演亦好好，雖然唔係多人，但都搵人扶我上落，家未知仔定女。」
害喜易頭暈
朱薰話之前因為未夠三個月，所以就冇刻意同大家講，好彩佢冇乜嘔，只係比平時攰好多，做做吓嘢會見頭暈，不過因為佢已接咗呢個舞台劇，加上又鍾意演戲，所以最終冇推辭，電台亦照返。原本安排對手喺佢面前吸煙，但導演都刪咗呢個場口。
前晚捧場嘅嘉賓有許志安、鄧麗欣同吳雨霏等，由於呢個劇黃柏高有份搞，所以盛傳過檔到黃柏高旗下嘅薛凱琪（Fiona）亦畀面到場，而主演嘅陳僖儀就話唔擔心Fiona會分薄資源，仲大讚Fiona好好人㖭，又話希望師姐帶住佢做嘢。
