奧運羽毛球女子雙打八強半準決賽，中國、南韓與印尼選手四隊八人因為比賽未盡全力，驚死贏波會在四強碰到另一組中國選手，竟然「鬥輸」，屢屢擊球落網，連我地呢啲中小學時代打過羽毛球嘅業餘人士都知，睇得出佢地打假波，好肉酸啫。一位股壇名嘴係羽毛球發燒友，依家幾十歲人仍然每個星期抽空打羽毛球，睇電視直播睇到撞火，佢對左丁山講：「呢八位女士係世界一流高手，兩位中國選手平時練發球起碼一萬幾千次，閉目都可以將個波打去任何一個角度，點會發球、擊球落網㗎！梗係教練叫佢地輸波走線啫。」
先有分組賽，後有淘汰賽，就會激發呢類走線問題，亞洲人教練特別「聰明」，往往諗埋走線呢一瓣，香港的報紙體育版評論員，就時時寫文章教球隊走線，避開熱門強隊啦，譬如日本女子足球隊在分組賽出線後，會碰上巴西，就俾人指係「計錯數」，點知日本贏埋巴西打入決賽啫。以左丁山多年睇國際大賽直播經驗，亞洲隊伍（主要係中韓）經常會諗埋呢樣嘢，顯示贏波第二，攞獎牌第一，為攞獎牌，不惜犧牲體育精神嘅作風，反之，歐洲球隊，特別係英國足球隊，就一場還一場，場場都希望贏，至於出線後會對住巴西還是阿根廷或西班牙，到時先至講。
近期香港炒起國民教育熱潮，其實國民教育要在學校學習，未免死板，難以吸收，家長憂心嘅話，與孩子睇奧運講體育精神就最好（不過弊在有啲家長會教細路走精邊，避免硬碰硬，自己為孩子洗腦）；各國奧運金牌英雄背後皆有一段奮鬥故事，十分勵志，反映各國之不同文化。中國金牌得主是怎樣訓練出來的？自幼被選中，離開家鄉，告別父母，苦練十數年，生活全由國家公帑照顧，一旦在奧運落敗，便無人理會，贏金牌則衣錦榮歸光宗耀祖。呢個制度是否最好？與中國爭金牌榜第一名嘅係美國，美國選手自幼參加學校（小學至大學）運動，有突出表現嘅就被選為精英，攞到獎以及商業贊助，但有時無人支持，要靠家庭支撐，成名後先至有大名牌贊助與廣告收入，贏金牌先至名成利就？輸咗就回復平淡私人生活。呢個制度又是否適合你？與孩子討論中美體育制度之不同，有益有建設性！國民教育從家庭開始，在家講得多，孩子腦袋便百毒不侵！