《台北市民大道》
台灣電影《那些年》男主角、現年21歲嘅柯震東自從同32歲嘅蕭亞軒拍拖後，已經好少夜蒲，得閒就同女友享受二人世界。不過邊有唔食魚嘅貓，大前晚柯震東忍唔住出動同兩個後生女去到台北市民大道一間火鍋店開餐，同行仲有兩個男士，三男二女好規矩咁男女分開坐一邊。
單拖打的走人
兩個少女打扮得好火辣，一個短裙露長腿，另一個就低胸，加埋打邊爐就真係好火熱。入行後柯震東嘅警覺性已經訓練到好高，所以冇耐就發現到有記者影相，佢即刻同男友人起身埋單走人。有晒經驗嘅佢企係門口等車時表現淡定，同行友人就有啲尷尬，兩個靚女直情唔敢行埋嚟怕俾記者影相。冇耐柯震東就自己一個坐的士走人，留低兩男兩女朋友自己搞掂，事後佢嘅經理人話係普通朋友聚會喎。
撰文：李森