情濃早餐！一個世紀的婚禮，也未必及這餐桌上、四個世紀的濃情！講緊唔係後面嘅情侶，而係西餐桌上永遠形影不離嘅鹽及胡椒瓶，佢哋嘅歷史可遠溯自十七世紀；可愛的塑形，是生活上的一點點綴，吃一口早餐，你可有感受到當中的深情？
記者：胡靜雯
攝影：林栢鈞
模特兒：Jennifer&Benson@PureModels
鹽胡椒瓶 法國人搞起
Salt&Pepper是今天西餐桌上必見之物！但佢哋由幾時走埋一齊呢？歷史要由17世紀歐洲講起，以前鹽同糖先係餐桌必備之物，不過直至文藝復興前後，法國人意識到鹹嘅食物有助於刺激食慾，而甜品則會令人有飽肚感，所以自此在餐桌上，糖被分了家出來！
至於胡椒又幾時變成第三者，同胡椒瓶形影不離呢？事件亦發生在法國、路易14世時期（亦係17世紀）；當時航海事業盛行，歐洲人多到中印度經商，帶來很多香料，胡椒就係其中之一，法國人認為胡椒係上等調味料，不會像其他香料遮蓋食物本身味道，所以胡椒廣為歐洲人所接受和認同，漸漸與鹽並駕齊驅，並成餐桌上永遠不死的組合。
童年夢幻 自行樽
茶記一成不變的鹽胡椒瓶令你有童年陰影？今日帶你尋回童話故事中的夢幻；青蛙王子、俄羅斯娃娃的鹽胡椒瓶，超艷麗的色彩與墜手的高質瓷，好難想像topchoice竟是國產出品！創辦人陳國柱先生，原來已經營了35年陶瓷貿易，主力做日式高價瓷器及高檔骨瓷出口，今次仲要係自己仔、自家品牌，質素及創意絕對直逼外國名家品牌。
愛孩子氣一點？英國SuckUK的機械人是相當玩嘢設計！設計靈感應該來自六十、七十年代的上鏈機械人，只要一經上鏈，佢就會暴走、由枱頭行到枱尾！如果Hea是你的生活態度，「唔該攞樽鹽嚟！」自此再不是你的夢魘。
HeavyMetal厚重耐用
金屬的簡約，最易融入居室！意大利ALESSI有隻八吋高不銹鋼鹽胡椒研磨器，設計者是美國建築師MichaelGraves，起用18/10不銹鋼材質，有耐酸鹼、抗腐蝕、高硬度功能，一般在高價餐具及醫療器材先見到，加埋類似螺絲帽的得意設計，果然是建築師手筆！
傳統早餐玩變革
如果低調的傳統，是你不離不棄的堅持？那你一定要認識荷蘭的Invotis，在拉丁文有「令人渴望的事物」之意，佢最愛在細節中，讓使用者尋歡作樂；雞蛋形的鹽胡椒瓶，座枱架仲要係一張防撞雞蛋墊，看着有點退色的頂孔位，你可曾記起第一次做復活蛋勞作時，用繡衣針拮蛋的那份情懷？
查詢：a.HOMELESS（28908789）
b.GeorgJensen（28680707）
c.ALESSI（28696377）