辛辛苦苦等到四年一度嘅奧運，如果係技不如人，拎唔到牌就話冇得講，但遇上奇怪意外就真係喊都無謂。古巴撐竿跳選手波格斯喺星期三初賽，起跳嗰陣，佢支竿斷裂一分為三。好彩係波格斯冇受到傷，雖然可以繼續比賽，但表現明顯大受影響，最後冇緣晉級決賽。
26歲嘅波格斯喺初賽由5米35開始試跳，點知一跳就出事。波格斯升到上半空嘅時候，支竿突然受唔住力，斷裂分成3截，令佢即刻跌落嚟。不幸中之大幸係波格斯冇硬生生撻落地，個人喺厚墊度着陸，亦都冇俾支斷竿插傷，總算係虛驚一場。
無傷再戰初賽出局
不過波格斯似乎受到呢次意外影響，去到最後一次試跳先過到5米35；過咗5米50之後，去到5米60就已經過唔到關。波格斯喺小組排第7，結果無緣晉身決賽。
作為古巴「鳥人」，波格斯近年表現都算唔錯，佢喺上年世錦賽以5米90攞到銀牌，仲刷新埋古巴紀錄。今次再戰奧運本來對自己都有好大期望，點知結果都係同4年前京奧一樣，冇辦法躋身決賽。
其實喺奧運撐竿跳比賽都唔係第一次發生呢類意外，前英國十項全能名將湯臣，喺88年漢城奧運力爭3連貫，但整體表現唔多掂，到撐竿跳項目又係升咗上半空嘅時候斷竿。嗰次湯臣就要冇咁好彩，大髀受傷，要包紮住完成埋餘下項目，最後得梗頸四，獎牌都冇。事隔咁多年撐竿跳用嘅裝置照計已經先進好多，估唔到一樣會案件重演。
專家之言：斷竿唔常見
香港十項全能及撐竿跳紀錄保持者、有線「2012倫敦奧運」評述吳哲穎解釋，斷竿情況唔算常見，但也會有發生嘅可能，「始終用玻璃纖維或碳纖維造成嘅竿，都會有老化嘅一日，所以支竿只要有一啲硬咗或者薄咗，嗰個弱點就會承受晒所有壓力，增加斷竿嘅可能性。」
吳補充，運動員通常會帶備最少3支竿出賽，大型運動會如奧運就可能會帶備更多，但斷完竿再比賽，難免會有影響表現。