【本報訊】銅鑼灣商場變天。揚言要打造成銅鑼灣新地標的希慎廣場今天開幕，面對同區時代廣場及崇光百貨夾擊下，希慎廣場不主打自由行客路，轉攻女性及潮流時尚的市場，希望突圍。有分析員指，新商場將為銅鑼灣注入生氣，有助搶回本港零售區一哥地位。
記者：程俊華 吳綺慧
希慎興業（014）花超過5年時間重建興利中心成為希慎廣場，可為集團提供穩定的租金收入，故集團高層對項目寄望甚殷。由於銅鑼灣區內兩大商場時代廣場及崇光都不約而同走自由行路線，面對市場的激烈競爭，希慎廣場卻不希望單靠自由行「搵食」，引入的租戶以潮流服飾為主，望吸本地年輕客。
70%商舖主攻年輕女性
商場昨舉行開幕前預覽，據記者實地了解，無論由軒尼詩道或啟超道進入商場，地下以售賣化妝品為主的TGALLERIA、兩層地庫分別售賣高級鐘錶及經營超級市場，此三層尚且能吸納自由客，已不見名牌皮具店蹤影。不過由一樓至七樓，清一色為日本及歐美潮流服飾及鞋履，當中超過70%為以女性作主題，明顯攻本地年輕一輩成朝拜新蒲點。當然，商場王牌租戶誠品部份日子將通宵營業，將銅鑼灣重塑成不夜天。
有外資分析員表示，銅鑼灣零售區過去向來是以崇光百貨、時代廣場形式的「雙中心」為主，中間其他場口礙於位置、規模等，始終是「做唔起」：「03年前一直都喺Sogo和TimesSquare獨大，喺自由行開始湧落嚟後，附近地區先旺番，形成初步的購物區，但仍然喺吸納唔晒啲人流，好多流失咗去其他地方。家希慎廣場就正正係填補咗中心個空位，形成明顯的零售三角地帶，應該會做大個餅，幫銅鑼灣搶番新客回來。」
該分析員續指，自由行實施以來，尖沙嘴近年發展一直明顯跑贏，總商場零售面積亦由於K11、TheOne等商場開幕後，3年前已超越了銅鑼灣。「希慎廣場啲商舖組合好多係新牌子，唔多會引起銅鑼灣區內競爭，反而係搶其他地區生意，追番尖沙嘴，重奪一哥地位。」
另一名本地服裝零售品牌高管亦稱，他們早年亦曾嘗試接觸希慎廣場，希望在內開店，但遭到拒絕：「佢哋好早已經講明主要做國際牌子，冇辦法。」他亦相信希慎廣場開幕後會令附近人流更暢旺，對整體銅鑼灣的生意有利：「但暫時睇唔到會影響同區其他商場或街道人流，唔會打算調整店舖地點。」
八成租戶仍裝修 添變數
雖然希慎廣場今天開幕，有指業主希望大部份租戶可在商場開幕時同時做生意，但暫時只見地庫二層、地下及一樓租客已準備就緒，目前有超過八成租戶仍在最後趕工中，當中以時裝樓層情況較嚴重，甚多舖頭仍在裝修中，櫥窗尚未佈置，應難趕及今天開舖，美國時裝品牌Hollister舖前電視螢幕展示，表明本月25日才營業。商場內部份設施，如扶手電梯，更有間歇性失靈的情況。
至於一直「玩神秘」的AppleStore仍在進行室內裝修，外牆以一大幅白布「冚到實」，加上業主及租戶尚未對外公佈開舖事宜，相信該舖本月內難望現真身。
遊客和市民點睇希慎廣場？
會嚟多啲
90後溫小姐：「行咗銅鑼灣咁多年，行嚟行去都係Sogo同TimesSquare，都覺得有啲悶，家有新商場開都覺得好開心！今日（昨日）都想入去睇吓，點知仲未開！除咗期待誠品之外，仲有啲品牌銅鑼灣甚至香港冇嘅，第日開咗會更加嚟多啲銅鑼灣。」
有吸引力
澳門遊客蘇先生：「嚟親香港都係去旺角多，銅鑼灣就間唔中，但之前都係去開Sogo。今次都係見有新商場喺呢邊，都係第一次過嚟（啟超道）望吓，如果新商場開咗之後，始終咁大型都會有吸引力，下次嚟香港都會行多啲銅鑼灣。」
想去誠品
孔先生：「由於銅鑼灣越嚟越似遊客區，都係久不久先嚟一次。本來打算一家四口到商場睇吓，特別想去誠品，呢間書店因為第一次入嚟香港，同埋全香港得呢度有，令銅鑼灣有番個主題，吸引力大咗。不過除誠品外，對其他租戶就冇乜認識。」
